Төрээн дыл – сагыш-сеткилдиң, чүректиң дылы-дыр. Ынчангаш төрээн дылывысты кажан-даа утпас болзувусса эки.

2015 чылдың төнчүзүнде Тываның Улустуң чогаалчызы Александр Даржай Тываның Баштыңы Шолбан Кара-оол-биле ужурашкаш, Тыва дыл хүнүн доктаадып, ону чылдың-на демдеглеп эрттирерин саналдаан турган. Ноябрь 1-ни Тыва дыл хүнү кылдыр доктаадыр, ону чылдың-на бо хүн демдеглеп эрттирер дугайында Чарлыкка 2016 чылдың январь 18-те Тываның Баштыңы адын салган.

Тыва дылым

Сүзүүм болган авайымның сүдү ышкаш,
Сүүзүннүг, мага-боттан адырылбас,
Тынар агаар, сеткилимниң хөрзүнү бооп,
Тыва дылым, дамыр-ханда тудуш-тур сен.

Кырган-ачам уран-мерген тоолундан
Кыштың узун кежээзинде сени танааш,
Маадырлыг өлбес чоннуң дылы-дыр деп,
Магадааштың, кезээ шагда ынакшаан мен.

Кашпал хемче шурай берген дидим кыстың
Өжээн-килең доюлдурар түрлүг ырын
Өшкүлерин дозуп чорааш, угбам уруг
Хаяларга чаңгыландыр ырлавыткан.

Ынай бодум ону дыңнааш, төрээн дылым,
Ыым келип, баарым адаа ажыш диген –
Ынчан сенден бир-ле дугаар ынакшылдың
Ыдык чаагай, өндүр арыын билген-дир мен.

Ыржым дүне. Чечектиг шык. Өглер удаан.
Ырак дээрниң сылдыстары көрүп турда,
Ынаам кыска сеткилимни ажыдарда,
Ынчан база буянныыңны көрдүм, дылым.

Александр Даржай