ТР-ниң Чазак Даргазының бирги оралакчызы Олег Бадының удуртулгазы-биле эң тергиин медиа-төлевилелдерни тодарадыры-биле комиссия ажылдаан. Ниитизи-биле 17 төлевилелди киирген. Шилилгени информатизация болгаш харылзаа яамызының сайыды Урана Насюрюн, экономика сайыдының бирги оралакчызы Белек Анай-оол, Тываның Баштының хүлээлгезин түр күүседип турар В. Ховалыгның парлалга секретары Чодураа Ховалыг, Тываның Хөй-ниити палатазының даргазы Анатолий Дамба-Хуурак, Тываның Ю. Кюнзегеш аттыг ном үндүрер чериниң кол редактору Николай Куулар, Россияның Журналистер эвилелиниң кежигүнү Татьяна Рамазанова чоруткан.
Бо чылын мөөрей ТАР-ның 100 чылынга тураскааттынган. Ажылдарны 3 аңгы номинацияга хүлээп алган: «Бурунгаар, Тыва!», «Тыва 100 чыл дургузунда: болуушкуннар, барымдаалар, кижилер», «Улусчу эгелээшкиннер чылы». Төлевилелдерни боттандырарынга 1 сая 600 муң рубль көрдүнген.
2021 чылда МИЧ-тер адырында грант алыкчылары шилээнин сагындыраал. Оларның аразында «Тыва, бурунгаар!» номинацияда: Буян Салчак (Покоряя Туву), «Твой информ» солуннуң редакциязы («Тува. Стратегия развития. Сохраняя традиции – строим будущее»), «Оваа-Медиа» КХН «Монологи» деп төлевилели-биле тиилээн.
«Тыва 100 чыл дургузунда: болуушкуннар, барымдаалар, кижилер» номинацияда:
— «Тувиночка» журналдың редакциязы;
— «Радуга Тувы» уругларның литературлуг сайтызы болган.
А «Улусчу эгелээшкиннер чылы» номинацияда «Тываның журналистер эвилели» тиилээнин сагындыраал.
