Россияда ортумак профессионал өөредилге албан черлеринде «Профессионалитет» дээр чаа программа ажылын эгелээн. Программа ортумак профессионал өөредилгениң системазын чаартырынга дузалыг. Ол кол бүдүрүлгелерге бедик мергежилдиг специалистерни белеткээринге дузалаар.
«Профессионалитет» деп федералдыг төлевилел Россия Федерациязының 2030 чылга чедир социал-экономиктиг хөгжүлдениң бот-идепкейиниң бирээзи. Ооң кол угланыышкыны – херек кырында экономика адырын организастаары болгаш колледжтерниң каттыжыышкыннарын көргүзүп турар өөредилге-бүдүрүлге төптерин (адырларын) тургузар. Төлевилел чурттуң регионнарының хөй кезиинде боттандырып турар болгаш, 900 колледжти хаара туткан — 2024 чылдың төнчүзүнде олар ортумак бөлүктүң 150 муң мергежилдиг специалистерин доостурар. Компаниялар идепкейи-биле төлевилелдиң ажылынче кирген: өөредилге программаларын тургузуп, материал-техниктиг баазаларны чаартып турар.
2023 чылдың сентябрь 1-ден эгелеп, Тываның агроүлетпүр техникумунуң баазазында «Профессионалитет» деп федералдыг төлевилел эгелээн дээрзин сагындыраалыңар.
Тываның Өөредилге яамызынга «Профессионалдар» («Профессионалы») мергежил уран аргазының талазы-биле Бүгү Россияның чемпионат шимчээшкининиң регионалдыг чадазының Оргкомитединиң хуралынга «Профессионалдар-2024» чемпионаттың эрттирер хүннерин тодараткан. Аңаа чемпионаттың эрттирер хүннерин, шөлчүгештерин болгаш угланыышкыннарын (компетенции) тодараткан.
Оргкомитеттиң шиитпири езугаар бо чылын чемпионаттың регионалдыг чадазы март 18-тен 23-ке чедир болуп эртер. Ол ышкаш 3 чаа угланыышкынны киирген – Тываның агроүлетпүр техникумунуң баазазынга эът болбаазырадыры-биле, уругларга болгаш улуг улуска немелде өөредилге, күш-культура, спорт база фитнес – оларны Тываның күрүне университединиң Кызылдың башкы колледжизинге эрттирер.
Ынчап кээрге, чемпионат 30 компетенцияга, ооң иштинде студентилер аразынга 25 компетенция (кол категория), школачылар (14-16 харлыг юниорлар) аразынга 5 компетенция. Ооң мурнунда оргкомитет компетенцияларны бадылаан турганын сагындыраалыңар.
Чемпионаттың иштинде шөлчүгештерге школачыларга профугланыышкынныг экскурсияларны болгаш чемпионаттың ажыл-херектиг программаларын организастаар.
Валерия САИН
«Тыванын аныяктары» солуннуң февраль айда үндүрүлгезинден.
