Чыл санында #Команда2030 аныяктар шуулганы эртери чаңчыл болган. Аңаа аныяктар боттарының социал төлевилелдерин камгалап, грантыларга киржип, тергиин төлевилелдер тиилеп ап келген. Оларның аразында 2019 чылдың грант тиилекчизи Диана Теспижектиң дугайында таныштырар-дыр бис.
Диана Теспижек — амгы үеде хөй-ниити ажылдарында идепкейлиг киржип турар аныяк кижи. Ол – Тывада бодибилдинг Федерациязының даргазы база «Ногаан фитнес» төлевилелдиң куратору.
Диана Санкт-Петербург хоорайның П.Ф. Лесгафт аттыг күш-культура, спорт болгаш кадыкшылдың Национал университединиң «туризм болгаш сервис» талазын дооскан. Питерге 4 чыл иштинде фитнес тренери болуп ажылдааш, чүгле 2019 чылда төрээн Тывазынче чанып келгеш, баштай Кызыл хоорайның аныяктар херээниң талазы-биле салбырның специализи кылдыр, а 2020 чылда ТР-ниң Экономика яамызының парлалга албанынга стажировканы эрткен.
Диана Теспижек амгы үеде «Ногаан фитнес» төлевилелди удуртуп, чайгы үеде Кызыл хоорайның ажык шөлдеринде спортчу-массалыг хемчеглерни чонга халас чорудуп турган. Ооң командазында хоорайның 10 ажыг тергиин тренерлери кирип турар болгаш, «Ногаан фитнес» төлевилелдиң 12 аңгы угланыышкыннары езугаар ажылдаан. Диананың бо эгелээшкинин Кызыл хоорайның культура, спорт болгаш аныяктар херээниң талазы-биле департаментизи деткээнин сагындыраал.
А 2019 чылда Диана Теспижек республика Баштыңының грантызынга киришкеш, бодунуң төлевилелин амыдыралга боттандырары-биле 62200 рубльге деткимчени алган.
Алена НАН-ХОО.
