Тывада чоннарның эп-дем чылы болгаш Россияда дагдыныкчының чылынга хамаарыштыр Бажың-Алаак сумузунуң культура төвүнүң коллективи Кара-Адырга кожуун чергелиг чайлаг байырлалын эрттирген. Бажың-алаакчылар тыва чоннуң чаагай езу-чаңчылдарын кадагалап, ону аныяк-өскен ортузунга нептередир сорулганы салганнар. Чайлаг байырлалынга ниитизи-биле 6 суму киришкеш, 12 номинацияга тергииннерни илереткен.
«Чайлаг байырлалы» – республиканың девискээринде катап сайзырап эгелээн байырлалдарның бирээзи. Чай санында тыва чоннуң национал культуразының эдилекчилери база ону сонуургаар улус-чон чыглып кээп, янзы-бүрү мөөрейлерге киржирлер. Ында тыва национал чемнерни белеткээринден эгелээш, харын-даа уттундуруп бар чыдар этнокультурлуг хемчеглер кирип турар. Чайлаг байырлалынга дүк дыдар, тараа хоорар, алгы эттээри дээн ышкаш өске-даа тыва чоннуң шаг-төөгүден кылып келген ажы-ижин кылып өөредир.
Алена Нан-Хоо белеткээн
Чурукту социал четкилерден алган
