«Тос-Карак» волонтёрлар ротазы: экер-эрес дайынчыларга камгалал

 Бүгү-россияның «Салгын» шимчээшкининиң иштинде «Тос-Карак» волонтёржу ротаның кежигүннери, Кызыл хоорайда «Тос-Карак» хамнар ниитилелиниң хам чаяачылары тускай шериг операциязының киржикчилери, экер-эрес дайынчыларның арты-мурнундан карактап чоруур камгалалды дилеп, сүлде-сүзүүн быжыглап, камгалалды дилеп, дайын-чаа соксап, тайбың доктаазын дээш тускай күштүг саңны, тускай ёзулалды, Вавилин ээтпээнде Тос Эртинелиг аът баштыг Күчүлүг оваага кылганнар.Ёзулалдың бир кол сагыыр ужурлуг дүрүмү – тыва чоннуң ада-өгбелеринден дамчып келген эдектиг тыва тоннарын кедип алыры.

«Тыва дайынчы оолдарывыска камгалал болзун дээш саң ёзулалын удаа-дараа кылып турар бис. Оолдары тускай шериг операциязында киржип чоруур иелер хөй. Оолдарывыс дээш сүзүглеп, тейлеп чоруур бис. Ол ышкаш бистиң «Тос-Карак» волонтерлар ротазының хамнары «Бүгү чүүлдү Тиилелгеже» акцияда идепкейлиг киржип, чажырттынар четкилерни-даа аргып, чылыг идик-хепти чыып, тускай камгалалдарны-даа чорудуп турар» - деп, тос-каракчыларның удуртукчузу Чаялга Сат демдеглээн.

Мира КОНГУЛ-ООЛ.
 Чаялга Саттың чуруу