Көдээ ишчилер: сайгарлыкчы, деткикчи, буянныг өг-бүле

Ырак-узак Мөңгүн-Тайга кожуунда сарлык кадарчызы өг-бүле, Бүгү-россияның «Салгын» эки турачылар шимчээшкининиң Мөңгүн-Тайга кожуунда "Тиилелге дээш" волонтерлар ротазының идепкейжилери Урана база Ачыты Салчактар тускай шериг операциязының киржикчилери, тыва дайынчы оолдарга, сарлык эъдин чедирип бээри-биле дамчытканнар. Буянныг өг-бүле чүгле эът-чем эвес, а чылыг хептер, чажырттынар четкилерни база хүлээткеннер.

- Дайынчы оолдарга сарлык эъдин үргүлчү чорудуп берип турар бис. Ол дээрге өөм ээзи Ачыты Салчактың ачызы-дыр. Ол кыштың соогу, чайның изии дивейн, сарлык малды азырап чоруур кижи. Бо эътти база орай дүнеге чедир белеткээн. Дайынчы оолдар дээш ада сагыш човаашкыны. Бистиң база бир кол дузалакчывыс - уйнуувус, ол кырган-ачазынга дыка дузалыг. Оглувус база тускай шериг операциязының киржикчизи. Эштери оолдар эът чиксээш, чагып турганнар болду. Ноябрь айда база дайынчы оолдарже бир сарлык эъдин чорудар бис.

Ол ышкаш бөгүн көдээ ажыл-агый ажылдакчыларының профессионал байырлалын таварыштыр организастаан ярмаркада киржип тур бис. Азыраан малывыстың эът-чемин доктаамал садып-саарып турар бис, чүгле Тыва иштинде эвес, а өске-даа регионнарже-даа үнгүлээр. Ам сарлык эъдин болбаазырадып, тушенка, колбасаны бүдүрүп эгеледивис – деп, өгнүң херээжен ээзи Урана Салчак таныштырган.

Мира КОНГУЛ-ООЛ.
Урана Салчактың чуруктары