Бүгү чүүлдү Тиилелгеже: Тожунуң эки турачылары идепкейлиг киржип турар

Тожу кожууннуң улуг-биче чону «Бүгү чүүлдү Тиилелгеже!» Россия чергелиг акцияда идепкейлиг киржип турарлар. Эки турачылар тускай шериг операциязының киржикчилеринге чылыг идик-хепти, эм-домну чыып, чажырттынар четкилерни өрээш, Кызыл хоорайда Бүгү-россияның «Салгын» волонтерлар шимчээшкининиң кол офизинче чорудуп турарлар.

Адыр-Кежиг суурда «Салгын» волонтерлар шимчээшкининиң иштинде «Идегел» волонтерлар ротазының кежигүннери «Тываның аныяктары» солунга мынчаар дамчыткан:

- Бистиң суурувуста «Идегел» волонтерлар ротазының кежигүннери, улуг-биче эки турачылар тускай шериг операциязының киржикчилеринге ачы-дузавысты көргүзер дээш кызымаккай ажылдап турар бис. Чажырттынар четкилерни өрүүрүнге школачылар безин киржип турар. Чеже-даа ырак-узак кожуунда болзувусса, «Бүгү чүүлдү Тиилелгеже» акцияда идепкейлиг киржип турар бис. Чыгдынган гуманитарлыг дузавысты өй-шаанда Кызылда офисче чорудуп тур бис» - деп, эки турачылар демдеглээн.

Мира КОНГУЛ-ООЛ белеткээн.
Тожунуң "Идегел" эки турачылар ротазының чуруктары