Өрттен арткан Бурганнарны чуп турар

Чөөн-Хемчик кожууннуң девискээринге өрт айыылындан когараан Үстүү-Хүрээниң Бурганнарын аштап-чуур ажылдар уламчылап турар. Бо хүннерде Бүгү-россияның «Салгын» волонтерлар шимчээшкининиң иштинде «Феникс» база «Дөгээ» волонтерлар ротазының эки турачылары Цеченлинг хүрээзинде өрттен арткан Бурганнарны чуп турарлар.

«Үстүү-Хүрээге болган өрт халавының соонда бүдүн арткан Бурганнарны аштап-чуур ажылдарда киржип тур бис. Бурганнарже кара ыш сиңе берген, ынчангаш ыш шоолуг адырылбас. Чартык хүн дургузунда чүгле ийи Бурганны чуп доостум» - деп, «Дөгээ» волонтерлар ротазының кежигүнү чугаалаан. Үстүү-Хүрээни катап тургузар хемчеглерни Тываның Баштыңы контрольга алганын сагындыраал.

«Өрт болган черни дарый аштап-арыглаарын дааскан мен. Эксперттер, тудуг инспекторлары арткан ханалар ажыглаттынып болур бе деп, шинчилээр ужурлуг. Ол ышкаш Тудуг яамызынга бажыңның таваан шинчилеп көөрүн дааскан мен» - деп, регионнуң удуртукчузу дыңнаткан. Ол ышкаш специалистер чаа хүрээ комплекизиниң тудуун эгелээр черни шилээн. Тываның Баштыңының дыңнатканы-биле алырга, таарымчалыг чер шилиттинген.

Мира КОНГУЛ-ООЛ.
"Феникс" база "Догээ" эки турачылар роталарынын чуруу