Немелде өөредилге ажылдакчыларының байырлалы

Немелде өөредилге ажылдакчылары профессионал байырлалын демдеглээн. Ук адырның педагогтары, тренерлери, методистери уругларның салым-чаяанын ажыдарынга дузалап, чаа чүүлдерни өөредип чоруур. Ол бүгү ажыл школаларның болгаш немелде өөредилге төптериниң бөлгүмнеринде доктаамал чоруттунуп турар. Бо хүн республиканың немелде өөредилгезиниң ажылдакчылары өөреникчилеринден байыр чедириишкиннерин, чылыг-чымчак сөстерни хүлээп ап турарлар.

Сүктер-Шимет Ондар, 10-гу классчы, хөй-ниитижи:
 

- Кызыл хоорайның 9 дугаар гимназиязының өөреникчизи мен. Школаның немелде өөредилгезинде «Өзүмнер» чогаадыкчы каттыжыышкынче 4 дугаар чыл барып турар мен. Башкывыстың адын Надежда Александровна Тыртык-Кара дээр. Ол – школаның немелде өөредилге төвүнүң удуртукчузу, «өзүмнерниң» башкызы база хореограф.Ол ышкаш «Звенящая капель» бөлгүмүнде барып эгелээнден бээр 3 чыл чеде берген мен. Ийи чыл дургузунда хор база ансамбль бөлгүмнеринге ырлааш, үш дугаар чылында солист кылдыр ырлап эгеледим. Чоокта чаа соло концертимни эрттирген бис. Репертуарымда ырылар 20 чедип турар. Оларның аразында орус, тыва, итали, англи, мексикан дылдардан тургустунган ырылар бар. Репертуарымны тургузуп алгаш, республиканың янзы-бүрү сценаларынга ырлап турдум. Ол ышкаш республика чергелиг ыры мөөрейинге киришкеш, бирги черниң лауреады шаңналга төлептиг болган мен.Гимназияның немелде өөредилгезинде ыры-хөгжүм талазы-биле башкымның адын Светлана Михайловна Монгуш дээр. Ол – Тыва Республиканың уран чүүлүнүң тергиини, «Саяннар» ансамблиниң хоочуну, дирижёр, мергежээн вокал башкызы.Бөгүн, немелде өөредилге ажылдакчыларының профессионал байырлалының хүнүнде, эргим башкыларымга база немелде өөредилге адырының шупту ажылдакчыларынга аас-кежикти, чогаадыкчы чедиишкиннерни күзеп тур мен.Амгы үеде республиканың девискээринде 5-тен 18 хар чедир 30000 ажыг уруг немелде өөредилгениң албан черлеринде хаара туттунган. Ында 530 хире башкы ажылдап турар.

Мира КОНГУЛ-ООЛ.
Авторнуң чуруктары