Изиг оъттуг Ийи-Талдың «Чечен сөстуг чуртташтарым» деп бөлүү 2021 чылда тургустунган. Аңаа 14 салым-чаяанныг, эгелеп чоруур, назы-хары аңгы-аңгы шүлүкчүлер мөөңнеттинген. Тывавыстың янзы-бүрү булуңнарында чурттап, ажылдап чоруур оларның аразында кандыг-даа профессияның кижилери: эмчилер, башкылар, бухгалтерлер, ИХЯ-нын, РФ-тиң айыыл чок чоруунуң федералдыг албанының хоочуну… бар. Бөлүктүң даргазынга Сурун-оол Инга Монгушевнаны, уруглар садының кижизидикчи хоочун башкызын чаңгыс үн-биле бадылап соңгаан.

Чогаалчыларның баштайгы шүлүктери «Улуг-Хем» солунунуң арыннарын таварыштыр чырыкче үнген.

2022 чылда:
1. «Салгалдарга үүжевис» деп шүлүктер чыындызы;
2. Саргылана Сааянын «Чогаалымдан төөгүп берейн» деп номун үндүрген.

Чечен-мерген чангыс чер-чурттугларывыс аңгы-аңгы чылдарда:
1. Саая Екатерина Кыргысовна «Изиг оъттуг Ийи-Талым» деп шүлүктер чыындызын;
2. Роза Кыргысовна Кенден «Мээн байым» деп шүлүктер чыындызын;
3. Елена Донгураковна Мандып-оол «Төрээн суурум Ийи-Талым» деп номун үндурген.

Чаа эгелеп чоруур шүлүкчүлерге арга-сүмезин кадыптар база шүлүктүң тургузуун ооредиптер чечен-мерген чогаалчыларывыс кожуунда барын магадап, «Уйгу чок Улуг-Хем» аттыг чечен-чогаал болгаш ыры-хөгжүм каттыжыышкынының кежигүнү болур чалалгаларны ийи-талчылар улуг өөрүшкү-биле хүлээп алганнар.