«Тываның буянныг чүректери» хөй-ниити шимчээшкининиң эки турачылары 82 харлыг библиотека ажылының хоочуну Галина Петровнаның бажыңының болгаш херим иштинде кажаа-хорааның крышазындан харны аштаарынга дузалашкан. Галина Петровна идепкейжилер-биле телефон дамчыштыр харылзашкаш, дузаны дилээн.

Хоочун бажыңының кырындан харны боду дүжүр октаарын оралдашкан. Ынчалза-даа болдунмаан. Эки турачылар ол-ла дораан командазын чыггаш, хоочуннуң бажыңынга четкен. Аныяктар харны каш-ла шак дургузунда аштап каапкан.

Хоочун библиотекаржы идепкейжилерниң кылган ажылының түңнелинге таарзынганын илереткеш, чедиишкиннерни күзээн. «Крыша кырындан харны аштаарынга биске чүгле хүүректер болгаш буянныг чорук кылыр изиг күзел херек болган» — деп, «Тываның буянныг чүректери» шимчээшкинниң идепкейжизи Чойган Ховалыг чугаалаан.