Тываның Баштыңының хүлээлгезин түр күүседип турар Владислав Ховалыг чоокта чаа Москва хоорайже ажылчын сургакчылаашкынының үезинде федералдыг бюджеттен 1,5 млрд рубльди республикага үндүрүп бээрин дилээн турган. Амгы үеде ук акша-хөреңгини Тываже шилчиткен. Ону республиканың кол-кол адырларынче чарган: медицина, энергетика, оруктар, экономика, көдээ ажыл-агыйы, социал адыр, культура болгаш спорт.

ТР-ниң спорт яамызының шугумун таварыштыр 38 сая рубль шилчээн. Бо акша-хөреңгиниң дузазы-биле чамдык спортчу оран-саваларның септелгезин чорутпушаан, чаа спортчу залдарны база тудар.
Спорт шугумунче шилчиткен акшаның хөй кезиин спортчу залдар тудуунче үндүрер. 5 өг хевирлиг бичежек спортчу залдарны база ангар хевирлиг 1 улуг спортчу залды тудары көрдүнген. Бичежек спортчу залдарже 1,8 сая рубль, а улуг залче 7,5 сая рубль чарыгдаттынар. Улуг спортчу залды Тес-Хем кожууннуң Самагалдай суурунга, а бичежек спортчу залдарны Кызыл кожууннуң Ээрбек суурунга, Мөңгүн-Тайга кожууннуң Мөген-Бүрен суурунга, Барыын-Хемчик кожууннуң Барлык суурунга, Чөөн-Хемчиктиң Хөндергейге база Чаа-Хөлге тудар.
Акша-хөреңгиниң ийиги чартыын Бай-Тайганың, Сүт-Хөлдүң, Каа-Хемниң спортчу школаларының база Кызыл кожуунда «Авырга» спортчу школаның септелгезинче чарыгдаар. Школа бүрүзүнче 4,5 сая рубльди чарыгдаары планнаттынган. Оон аңгыда Кызылдың СШОР-га 2,08 сая рубльди соңгалар чаартырынче үндүрер. Арткан акша-түңнү Улуг-Хем кожууннуң спортчу залынга автономнуг одалга черин тударынче чарыгдаар.

#федеральныесредства #распределение #спортзалы #минспорт #молодежь #ЗОЖ #тыванын_аныяктары