8-тен 17 харга чедир назылыг ажы-төлге апрель база майның төлевирлерин Тывада 15 муң ажыг өг-бүле алган. 26,5 муң уругга ниитизи-биле 540,7 млн рубльди төлээн. ТР-ниң Күш-ажыл болгаш социал политика яамызы ол болгаш өске-даа төлевирлерниң дугайында республика Баштыңы Владислав Ховалыгга илеткээн.

Яамының сан-чурагайындан алырга, чаа төлевирни 43761 уругга төлээр. 32932 уруг үстүкү түңнү – 12702 рубльди алыр. А артканнары Тывада тургустунган амыдырап-чурттаарының кудуку деңнелиниң 75 база 50 хууга дең пособие акшазын алыр. Баш бурунгаар санаашкыннардан көөрге, төлевирлерге 4 млрд. 482,8 млн. рубль бюджет акша-хөреңгизи херек.

Ол төлевирлерден аңгыда, ТР-ниң Күш-ажыл болгаш социал политика яамызының шугуму-биле ажы-төлдүг өг-бүлелерге шупту 5 млрд. 547,85 млн рубль акшага 7 аңгы социал деткимчени көргүзер. Оларда бирги, үшкү база дараазында чаш төрүттүнгенде (азырап алганда) уругга ай санының төлевирлери, 3-тен 7 харга чедир уругга төлевир, өскүс база ада-иениң хайгааралы чок арткан уругларны азырааны дээш пособие, ийис база хары угда оон хөй чаштар төрүттүнгенде ада-иеге чаңгыс катап бээр төлевир, ол ышкаш регионнуң ие капиталы кирип турар. 86011 уругга пособие дээш 5, 5 млрд. рубльди бюджетте аңгылаан.

Чыл эгезинден, азы январь – май дээш республиканың 105 муң чурттакчызы социал деткимчени ажыглаан. Оларга ниитизи-биле 2 млрд. 842,26 млн. рубль түңнүг пособиелерни үлээн.

Тыва Чазак