Тывада часкы кыйгыртылга кампаниязы уламчылавышаан. Барыын, Төп болгаш Чөөн чүк шериг округунуң шериг кезектеринге албан хүлээлгезин эрттирери-биле бөгүнге чедир 550 ажыг оолдар Республиканың чыылда пунктузундан аъттанганын, регионнуң шериг комиссариады дыңнаткан.
400 ажыг кижи чадаг шериг кезектеринге шериин эрттирер болза, эмчи шинчилгези база тестилер түңнелдери-биле 15 оол Рязань облазының Агаар-десант шериинге хүлээлгезин эрттирер. Юрга хоорайда спортчу ротага Тывадан 10 оол албанын эрттирер. Иркутск хоорайда стратегтиг сорулгалыг ракета шериглеринге — 14, агаар-космиктиг күштерге – 30 ажыг, шериг-далай флодунга 10 кижи шериглээр.
Шеригже кыйгырткан оолдарны тускай идик-хеп, бичии чүүлдер суггар тускай хап, “Мир” национал төлевир системазының банк карталары база аттарында электроннуг карталар-биле хандырганын республиканың шериг комиссариады дыңнаткан.
Шериг албанынче 18 — 27 харлыг аныяк оолдарны кыйгыртырын сагындыраал. Шеригже кыйгырткан оолдар Россияның чаа регионнарындан өскеде, аңгы-аңгы регионнарда шериг кезектеринге 12 ай дургузунда албан хүлээлгезин эрттирер. Шеригже кыйгыткан оолдарны тускай шериг операциязынче хаара тутпас. Апрельдиң 1-де чуртта эгелээн часкы кыйгыртылга кампаниязы июль 15-те доостур. Республиканың комиссариаттарында шеригже кыйгыртыр оолдарга база оларның ада-иелеринге “тускай изиг шугумунуң” телефоннары ажылдап турар, оон сонуургаан айтырыгларынга харыыларны ап болур. https://rtyva.ru/content/2750/51895/ сайтыдан дугаарларның долу даңзызын тып ап болур.
Амгы кыйгыртылга кампаниязының үезинде Тывадан 700 оолдар шериг албанынче аъттанырлар.
