Тываның Арбитраж судунуң ажылдакчылары ТР-ниң Үндезин хоойлузунуң хүнүн уткуштур республиканың кадеттер корпузунуң 8-ки классчыларының аразынга викторинаны эрттирген.

Суд ажылдакчылары кадеттерге республиканың Үндезин хоойлузунуң дугайында таныштырылганы кылбышаан, кижиниң эргелериниң болгаш хүлээлгелериниң дугайында таныштырган.

Интеллектуалдыг оюнга 5 команда киришкен. Оолдар, уруглар улуг сонуургал-биле айтырыгларга харыылаан. Ниити баллдар түңү-биле алырга, бирги черни «Успех» командазы, ийигизин «Патриот», үшкүзүн «Единство» чаалап алган. Кадеттер оюнга идепкейлиг киржип, төрээн чериниң дугайында боттарының шыырак билиин көргүскен.

«Тываның Конституциязының төөгүзүнге хамаарышкан болгаш күрүне демдектериниң, дылының, девискээриниң дугайында айтырыгларга кадеттер харыылаан. Оон аңгыда эрге-хоойлунуң системазы, хоойлужудулга, шүүгү эрге-чагыргазы, бойдус курлавырлары, чаштарның эргелерин камгалаар төлээниң дугайында айтырыглар кирген. Тываның Үндезин хоойлузунуң хүнү күрүне байырлалы кылдыр санаттынар. Ол бистиң республикавыста база бир чугула хүн. Аныяк-өскен хүн бүрүде амыдыралында хоойлу-дүрүм езугаар эргелерин, хүлээлгелерин билип эгелээни өөрүнчүг. Уругларның эрге-хоойлу талазы-биле билиглерин хевирлээр сорулгалыг мөөрейни чыл санында эрттирери чаңчыл апарган» — деп, викторинаның организаторлары демдеглээн.

Алена НАН-ХОО белеткээн.

Чурукту социал четкилерден алган.