Бөгүн, октябрьның 7, Россияның Президентизи Путинниң төрүттүнген хүнү. Владимир Путин Ленинград хоорайга 1952 чылдың октябрь 7-де эртен эрте, 8 шактың 35-46 минуталар аразында төрүттүнген.

Россияның Президентизинге ооң төрүттүнген хүнү-биле байыр чедириишкиннери бистиң улуг-делгем чуртувустуң бүгү булуңнарындан болгаш даштыкы чурттардан хөйү-биле кээп турар. Кадыкшылды, аас-кежикти, президент ажыл-херектеринге чедиишкиннерни бөдүүн кижилер, бедик албан-дужаалдыг даргалар, даштыкы чурттарның удуртукчулары күзеп турар.

Бистиң чаңгыс чер чуртуувус, Россияның маадыры, РФ-тиң Камгалал сайыды Сергей Шойгу биле Президент Путин чай чок ажыл-херектерден кыска хостуг үелерин Тывага кээп дыштанырынга ынак. Тыва черниң каас-чараш, арыг агаар-бойдузу Владимир Владимировичниң сеткилинге дыка таарышкан.

Россияның Президентизи Тыва Республикага ажыл-херектер аайы-биле база каш катап кээп чораан. Тываның чонунуң ажыл-ижин, амыдырал-чуртталгазын ол эки билир, ынчангаш республиканы берге үүле-херектерге деткип турар.

Медээлер «ТуваМедиаГрупп» ИА

#Путин #ТөрүттүнгенХүнү #РоссияныңПрезидентизи #ТМГмедээлер #Тыва #Тывамедээ #Тывадыл #Тывамедиагрупп #Тува #Tuva #TMG #TMGNEWS #Tuvanews