ТАР-ның 100 чылын таварыштыр Ачыты Нурзат «Шойгу Маадыр» деп ырыны бараалгатканын билир бис. Чоокта чаа ооң кливин тырттырган. Ырының төөгүзүн Ачыты Нурзат #Тыванын_аныяктары солуннуң штаттан дашкаар корреспондентизинге мынчаар таныштырган:

— Тимур Кадын-Наваның бижээн сөстеринге уран чүүлдүң алдарлыг ажылдакчызы Оксана Тюлюш аялганы чогааткан. Ырыны мен эжим Альберт Маады-биле ырлаан бис.
Чоокта чаа аңаа клипти тырттырдывыс. Клип тырттырар дугайында бодал эрткен чылын-на бажымга кирген. Ону боттандырар дээш дыка хөй ажылдарны кылдым. Баштай эге вариантызын тудуп алгаш, Григорий Дамдындан дуза дилеп четкен мен. Ол меңээ ырының сөзүн бичии өскертип алырын сүмелээн. Ынчангаш клиптиң сюжеди Сүбедей Маадырның үезинден эгелээн.

Бо клипти тырттырарынга үлүг-хуузун киирген, меңээ дузалажып, деткимчени көргүскен Григорий Дамдынга, РФ-тиң алдарлыг артизи Эдуард Ондарга, ТР-ниң уран чүүлүнүң алдарлыг ажылдакчызы Оксана Тюлюшке, шүлүкчү Тимур Кадын-Навага, аранщировщик Азият Монгушка, Тываның культура яамызынга, «Тува 24» телеканалга, Кызыл хоорайның мэриязынга, 55-ки даг-адыгжы бригадтың коллективинге, Тываның аът федерациязынга база «Дайынчы акы-дуңма» хөй-ниити организациязынга четтиргенимни илереттим.

Алена НАН-ХОО.