Бүгү Россияның экологтуг диктантызы бо айның 27-ге чедир болур.
Экодиктант – чыл санында эртип турар төлевилел, ону хамаатыларның экологтуг культуразын бедитпишаан, бойдус камгалалының талазы-биле билиин хевирлээр сорулгалыг эрттирип турар. 2021 чылда 105 чурттан 3,4 сая кижи киришкен.
Бо чылын экологтуг диктант Тываның девискээринде база ноябрь 27-ге чедир үргүлчүлеп турарын сагындыраал. Киржикчилер Байкалдың, Арктиканың, агаар-бойдустуң, заповедниктерниң дугайында айтырыгларда харыылап турар.
Тывада экологтуг диктантыны организастаары-биле, 8 аңгы оффлайн-шөлчүгештер ажыттынган. Бо үе дургузунда республиканың аныяктары экодиктантыга идепкейлиг киришкен. Ооң түңнелин ноябрь 30-де үндүрер.
«Бо чылын Россия Федерациязының девискээринге 85 эвес, а 89 регионга оффлайн-шөлчүгештер ажылдаар. Донецк, Луганскыдан база киржир күзелдиг хамаатылар хөй» — деп, экологтуг диктантының федералдыг оргкомитединиң удуртукчуларының бирээзи Наталья Соколова чугаалаан.
