XXXI национал аът чарыжының сезонун ажыдар

Тыва чоннуң эң-не көрүштүг, хөй кижи киржилгелиг адаан-мөөрейлериниң бирээзи — национал аът чарыжы. Республиканың XXXI аът чарыжының сезонун 2024 чылдың апрель 27-де Чөөн-Хемчик кожууннуң Чадаана хоорайга албан-езузу-биле ажыдар. Байырлыг ажыдыышкынга тураскааткан аът чарыжы Чадаана хоорай чоогунда Кара-Булак деп черге эртенгиниң 8 шакта эгелээр. 8, 10, 15 км дистанцияга болур аът чарыжынга кожуун, суурларның чылгычылары, арат-фермер ажыл-агыйлары, ол ышкаш аъттар чарыштырып турар хуу кижилер киржип болур. Аът чарыштарынга айыыл чок чорукту сагыыры эң-не кол айтырыг. Ынчангаш маргылдааның киржикчилери национал аът чарыжының шупту дүрүмнерин сагыыр болгаш күүседир ужурлуг. Маргылдааның дүрүмү езугаар бо чылын аът чарыжын Кызыл болгаш Тере-Хөл кожууннар организастап эрттирер. Тываның XXXI аът чарыжының кол шаңналы — автомобиль!