Владислав Ховалыг Тываның чаа соңгуттурган X Камбы-Лама Башкызы-биле ужурашкан
– Тываның чаа соңгуттурган Камбы-Лама Башкызы Лоден Шераб Хелиң-биле чонувустуң, республикавыстың чаагай келир үези дээш ажыл-чорудулганы демниг боттандырарын дугуруштувус.
2026 чылда Тывага IV делегей чергелиг буддийжи шуулганны организастап эрттирер болгай бис. Аңаа шыңгыы белеткел негеттинер.
Бурят болгаш Калмык республикаларның арга-дуржулгазын өөренип көрүп, шуулганны бедик деңнелге эрттиреринге чүгле эрге-чагырга черлери эвес, а бүгү чонувустуң деткимчези чугула херек. Ооң-биле кады республикавыста сарыг шажын чүдүлгелиг чонувус база Камбы-Лама эргелели улуг рольду ойнаар ужурлуг. Шак ол шуулган чүгле сарыг шажын делегейинде көскү болуушкун эвес, а эртемге, культурага база туризмге улуг идигни бээр дээрзи чугаажок.
Камбы-Лама Лоден Шераб Хелиң бодунуң талазындан Тываның сайзыралы, тыва чоннуң чаагай чоруу дээш бүгү күжүн өргүп ажылдаар дээрзин дыңнатты – деп, Тываның Баштыңы бодунуң блогунда бижээн.
тмг
