Владислав Ховалыг: Россияда Өг-бүле, ынакшыл болгаш шынчы чоруктуң хүнү-биле!
Бо чылдың июнь 28-те чурттуң Президентизи июль 8-тиң хүнүн Россияда Өг-бүле, ынакшыл болгаш шынчы чоруктуң хүнү кылдыр доктааткан. Байырлалдың төөгүзүн алгаш көөр болза, ол 2008 чылда, Россияга Өг-бүле чылын чарлаанда, тывылган.
Тываның Баштыңы Владислав Ховалыг чаңгыс чер-чурттугларынга байыр чедирген:
- Хүндүлүг чаңгыс чер-чурттугларым, Силерни Өг-бүле, ынакшыл болгаш шынчы чоруктуң хүнү-биле сеткилим ханызындан байыр чедирип тур мен!
Бөгүн бо кайгамчык байырлалды күрүне чергелиг демдеглеп турар. Ол дугайында Айтыышкынга Россияның Президентизи Владимир Путин ат салган.
Өг-бүле – бо чуртталгада эң-не үнелиг чүүл, ынакшыл, билчилге, хүндүткелдиң болгаш деткимчениң дөзү. Тывада чаңчыл езугаар өг-бүле доңу быжыг. Мээң өг-бүлем – быжыг чөлеңгиижим, олар - эң-не чоок, үнелиг кижилерим.
Бо байырлал кижи бүрүзүнге бодунуң чоок кижилеринге, ада-иезинге, уруг-дарыынга кичээнгейни салыр чаагай чаңчыл болзун. Өг-бүлеңер быжыг болгаш төнчү чок аас-кежиктиг болзун.
Мира КОНГУЛ-ООЛ белеткээн.
