Владислав Ховалыг: Өг-бүлеңерге өөрүшкү-маңнайны күзедим!

Бөгүн бүгү делегейде Өг-бүле хүнүн демдеглеп турар. 1980 чылдарда КНО өг-бүле айтырыгларынче кичээнгейни салып эгелээн. А бир дугаарында өг-бүле хүнүн 1994 чылда эрттирген. Россияда 2016 чылдар бээр «Чылдың өг-бүлези» мөөрей эртип турар. Ында «Хөй ажы-төлдүг өг-бүле», «Аныяк өг-бүле» «Көдээ черде өг-бүле», «Россияның алдын өг-бүлези» болгаш «Өг-бүле - ужур-чаңчылдарның кадагалакчызы» деп номинациялар кирген. Өг-бүле хүнү-биле Тываның Баштыңы Владислав Ховалыг чаңгыс чер-чурттугларынга байыр чедирген: - Өг-бүле дээрге кижиниң чуртталгазында эң-не кол чүүл-дүр. Делегейде өг-бүлени солуптар хире үнелиг чүве чок. Чоок кижилерим – өөм ишти Айлана, оолдарым Александр биле Владлан, кериннерим база уйнуктарым - мээң быжыг чөлеңгиижим, хей-аът киирип, чүглендирер кижилерим. Ооң-биле чергелештир ол – улуг харыысалга-дыр, шынчы чорукту, бот-боттарының аразында харылзааны тудуп билири. Быжыг, аас-кежиктиг өг-бүле – республиканың келир үезиниң болгаш сайзырал-хөгжүлдезиниң үндезини. Хүндүлүг чаңгыс чер-чурттугларым! Силерниң өг-бүлеңерге кезээде хүндүткел, өөрүшкү, деткимче чоруурун сеткилим ханызындан күзедим. Өг-бүлеңер быжыг болуп, өөрүшкү-маңнай үзүлбес болзун! Бүгү делегейниң Өг-бүле хүнү-биле! Мира КОНГУЛ-ООЛ белеткээн. Тыванын аныяктары/Молодежь Тувы