Улуг-Хемниң Кадын-башкызын болгаш Ноян-башкызын илереткен

Улуг-Хем кожуунга "Кадын-башкы болгаш Ноян-башкы - 2022" башкылар ортузунга мөөрей эрткен. Мөөрейниң киржикчилери боттарының уран талантызы, каас-чараш идик-хеви-биле көрүкчүлерниң сонуургалын чаалап алган. Башкының хүнүнге тураскааттынган мөөрей байырлыг шинчиге эрткен. Көрүкчүлер башкыларның салым-чаяанын, угаангыр-сагынгырын база бүгү тала-биле сайзыраңгайын үнелээн. Ол ышкаш башкыларның коллективтери коллегаларын диңмиттиг адыш часкаашкыннары-биле деткип турган. Мындыг солун мөөрейниң түңнелинде, "Ноян-башкы" деп онзагай атты Шагаан-Арыг хоорайның дугаары 1 школазының күш-культура башкызы Амыр-Санаа Минчээ чаалап алган. А "Кадын-башкы" деп чараш атка Арыскан ортумак школазының орус дыл болгаш литература башкызы Аэлита Наважап төлептиг болганын сагындыраал. Мира КОНГУЛ-ООЛ белеткээн.