Улуг-Хем кожуунда хууда сайгарлыкчылар хөй

Улуг-Хем кожууннуң девискээринде 437 биче болгаш ортумак чергениң хуу сайгарылга черлери бүрүткеттингенин чагырга чери дыңнадып турар. Садыг-саарылга черлериниң ниити саны - 116, оларның 83-ү Шагаан-Арыг хоорайда, 33-ү суурларда ажылдап турар. 116 садыгларның иштинден 90-ны аъш-чем садыглары болуп турар. Артканнары идик-хеп, тудуг аймаа болгаш бажың-балгатка ажыглаар эт-сеп, үүрмек чүүлдер садып турар. Хөй-ниити чемненилге черлери шупту 15, оларның 13-ү Шагаан-Арыг хоорайда, 1-зи Иштии-Хемде ("Сай-Хонаш"), 1-зи Арыг-Үзүүнде ("Азия"). Кывар-чаар материалдар садып турар 8 автозаправка бар. Хоорайның иштинде 5 эм-таң садып турар аптека черлери бар.