Тываның Баштайгылары «Россияның школачы чазы» фестивальдың тускай шаңналынга төлептиг болган

«Россияның школачы чазы» бүгү Россияның II фестивалы Ставропольга болуп эрткен. Ооң Национал финалынга Россияның 79 регионундан 12-ден 18 харга чедир 1,2 муң аныяктар киришкен. «Россияның школачы чазы» фестивальга Тываны Кызыл хоорайның 2 дугаар школазының өөреникчилери төлээлээн. «Хуулгаазынныг хээлер» чогаадыкчы коллектив тыва чоннуң онзагай бүдүштүг культуразын танцы-сам таварыштыр чедимчелиг илередип шыдаан. Алдыгы классчы бичии самчыларның улуг масштабтыг сценага бир дугаар үнген көргүзүүн көрүкчүлер адыш часкаашкыннары-биле деткээн. Бичии самчылар эксперттерниң болгаш көрүкчүлерниң сонуургалын чаалап алганы чугаажок. Уругларның салым-чаяанын болгаш кызымаккайын жюри кежигүннери эскерип, «Хуулгаазынныг хээлер» чогаадыкчы коллективке "Улусчу чаңчылдарны кадагалап арттырганы дээш" деп тускай шаңналды тывысканын Движение Первых | Тыва уругларның болгаш аныяктарның хөй-ниити организациязы дыңнадып турар. Алена НАН-ХОО белеткээн. Чуруктарны социал четкилерден алган.