Тываның Баштайгылары чоннар аразының харылзааларын быжыктырган
Тываның Баштайгыларының удуртукчузу Эртине Куулар Моолдуң хамаатылары Анар Хурманхан база Баасансурэн Болдбаяр-биле ужурашкан. Оларны ТывКУ-нуң башкызы Цэцэгдарь Уламсурэн үдеп чораан. Ол дугайында Баштайгыларның парлалга албаны дыңнаткан.
Анар биле Баасансурэн Моолдуң Ховд аймаанда даштыкы дылдар төвү ажыдып алганын чугаалаан. Олар ында англи дылды өөредип эгелээн. Моол уруглар орус дылды аажок сонуургаар дээрзин олар демдеглээн.
Анар Хурманхан – ТывКУ-нуң филология факультединиң доозукчузу, амгы үеде төөгү факультединиң магистратуразында өөренип турар. Моол чаштарның орус дылга сонуургалын өөренип көргеш, олар Тываның чайгы лагерьлерге моол школачыларның дыштанылгазын организастаар дугайында саналды киирген. Аныяк башкылар ыяап-ла Баштайгыларның дыштанылга сменазын шилип алырын күзээннер. Эртине Эресович Куулар база аалчылар Моол күрүнениң школачыларының дыштанылгазынга хамаарышкан шупту хевирлерни сайгарып чугаалашканнар. Организастыг айтырыглар хөй. Ол бүгүнү хынамчалыг ажылдап кылыры чугула.
Тывага кожа чурттан уругларның чайгы дыштанылгазы орус база тыва дылдарны шиңгээдип алырынга, тус черниң езу-чаңчылдары, агаар-бойдузу-биле таныжып алырынга дузалыг. Ол ышкаш уруглар чүгле солун-хөглүг эвес, а өөредиглиг дыштанылганы эрттирерлер. Кожа-хелбээ чурттуң уруглары-биле кады дыштанылга аныяк-өскенниң кады ажылдажылгазының эге дөзү болбушаан, чоннар аразының харылзааларын быжыктырар.
Мира КОНГУЛ-ООЛ.
Аяна ЛАМАНЫҢ чуруктары
