Тываның аныяктары чугаалап тур!
Бо чылдың эгезинден тура ТР-ниң Аныяктар херектериниң талазы-биле агентилели «Тываның аныяктары чугаалап тур!» деп дамчыдылганы чорудуп эгелээн. Ооң аалчылары республиканың чедиишкинниг аныяктары, аныяктарның хөй-ниити организацияларының удуртукчулары болуп турарын сагындыраал.
«ТА»-ның редакция биле Аныяктар херектериниң талазы-биле агентилелиниң дугуржулгазы езугаар дамчыдылганы солун арнынга чырыдары көрдүнген. Ооң интернет-хевириниң башкарыкчызы Чейнеш Очур, а дамчыдылганы солун арнынга чырыдарын редакцияның аныяк корреспондентизи Алёна Нан-Хоо чорудар. Бо удаада «Тываның аныяктары чугаалап тур!» дамчыдылганың киржикчизи, агентилелдиң аныяк специализи Долбаана Адыг-оол-биле чугааны номчукчуларывыска таныштырдывыс.
— Долбаана, бодуңнуң дугайыңда таныштырып көрем.
— Төрүттүнген черим – Кызыл хоорай, маңаа-ла школаны дооскан мен. Оон Бурят Республиканың күрүне университедин дооскаш, дораан-на агентилелге ажылдап келгеним бо. Дооскан мергежилим база амгы үеде ажылымга кончуг тааржыр.
— Бир дугаар ажылдап эгелээн үелериңни сактып көрем.
— Аныяктар политиказынче 2021 чылда ажылдап келдим. Бир дугаар ажылдап келиримге-ле, мында ажыл-иш хайнып турар болган. Хемчеглер-даа хөй. Чаа-чаа кижилер-биле ужуражып, оларның-биле кады ажылдаар. Баштай кылып эгелээн албан-хүлээлгем езугаар Тываның Камбы-ламазы-биле ынчангы агентилелдиң директору Эртине Кууларның ужуражылгазының дугайында интернетче үндүр салыры турган. Оон бээр-ле Тываның ат-сураглыг, чедиишкинниг кижилери-биле ужуражып чугаалажып эгелээн мен.
Оон аңгыда республиканың янзы-бүрү кожууннарынче ажылчын сургакчылаашкыннар бар. Чуртталгамда бир-ле дугаар Мөңгүн-Тайга кожуунга база четтим. Шак мынчаар ажылдааш, арга-дуржулга ап тур мен.
— Аныяктар херектериниң талазы-биле агентилелге ажылдап кээр мурнунда, кандыг-бир хөй-ниити организациязының кежигүнү турган сен бе?
— Ийе, студентилеп тургаш, баштайгы дээрезинде хемчеглерге идепкейлиг киржип турдум. Бөлүүмнүң даргазы турган мен. Ооң соонда факультедимниң профбюрозунуң кежигүнү кылдыр киргеш, элээн болганда, ооң оралакчы даргазынга соңгуткан мен.
Аңаа 2 чыл хире ажылдааш, креативтиг аныяктар-биле дорт харылзажып, янзы-бүрү хемчеглерни эрттирип турган бис.
— Амгы үеде Бурятияда студентилерниң землячествозу-биле харылзааң бар бе?
— Бурятияда тыва студентилерниң бөлүүнден ам-даа үнмээн болгаш, оларга үргүлчү янзы-бүрү аныяктарга хамаарышкан медээлерни октап бээр-дир мен. Ында ам-даа таныыр аныяктарым бар. Оларның-биле харылзажып турар бис.
— Аныяктар ортузунга кандыг-бир хемчегни организастаары ындыг амыр эвес болгай. Чижээлээрге, республика чергелиг шуулган дижик, чүүден эгелеп алыр болза экил?
— Мен бодаарымга, шупту чүве идеядан эгелээр. Оон улаштыр ону эрттиреринге чүү херегил? Ооң киржикчилери, спикерлери, болур ай, хүнү дээн ышкаш айтырыгларны шиитпирлеп алыры. Улаштыр организастыг айтырыглар эгелээр.
— Эрткен чылын #КомандаТувы2030 аныяктарның шуулганы эрткен болгай. Ону чугаалап көрем.
— Чыыш үезинде мен киржикчилерни аъшкарар-чемгерер талазын харыылап турдум. Ниитизи-биле 100 ажыг кижини черле чемгерген боор бис. Оларның аразында киржикчилерден аңгыда, эки турачылар, организакчылар, спикерлер база турган.
Чыыш үезинде эки турачыларның ажык-дузазы дыка улуг болган. Оларны кым-даа албадавайн турган, боттары-ла бир-ле чүүлдү кылып, киржикчилерге, аалчыларга дузалажып турган.
— Тывада аныяктарның хөй-ниити организациялары хөй болгай. Ооң кежигүнүнге кирип, эки турачы болур дизе, чүнү кылырыл?
— Эки турачы болурунга, бир дугаарында, кижиниң изиг күзели херек — бир кижиге дуза кадып, деткимче кылыр күзел. Ол чокта, болдунмас. ДОБРО.РУ деп сайт таварыштыр кирип ап болур. Оон аңгыда республиканың иштинде болуп турар хемчеглерге эки турачы кылдыр киржип болур, чүгле чагыгны киирер. База бир аргазы: кандыг-бир хөй-ниити организациязының кежигүнү кылдыр кирип ап болур. Улуг назылыг «мөңгүн» эки турачылар база бар.
Ниитизи-биле ниитилелге-даа азы кандыг-бир кижилерге ажыктыг чүүлдү кылыры буянныг чорук дээрзи билдингир.
Чуруктарны хууда архивтен алган.
Тыванын аныяктары/Молодежь Тувы
