«Тыва авиа» компанияның чаагай чаңчылы: «Школага белеткениринге дузалаш!»

Авиакомпания чыл санында республика чергелиг «Школага белеткениринге дузалаш! акцияга идепкейлиг киржири чаңчылчаан. Бо чылдың август айы база ындыг. Бо удаада Кызыл хоорайның дугаары 11, 12 школаларының өөреникчилери база ада-иелер биле авиакомпанияның ажылдакчылары ужуражып, 16 уругга адрестиг дузаны чедирген.
Белектерде өөредилгеге херек шупту чүүлдер бар: портфельдер, кыдырааштар, карандаштар дээш оон-даа өске. Школа белеткелинге ада-иениң чарыгдалын эвээжедир сорулга-биле спортчу хептерни, идиктерни, формаларны безин саткан. Беш-алдыгы классчы бичии оолдар кроссовка идиктерни белек кылдыр алгаш, өөрүшкүзүн #Тыванын_аныяктары солуннуң корреспондентизи-биле үлешкеннер.
Өөөредилге дериг-херекселдерин белекке алган бичии оолдар-уруглар хөй ажы-төлдүг өг-бүлелерден дээрзин сагындыраал. Чижээлээрге, алдыгы классчы Сайын-Белектиң кады төрээннери тос кижи, оларның аразында чеди кижини школаже белеткээр. Ынчангаш авиакомпаниядан деткимчени алган ада-иелер ооң директору Чингис Каминовка четтиргенин #Тыванын_аныяктары солун таварыштыр илереткеннер.
Алена НАН-ХОО