Тываның аныяк активчилери Бии-Хем кожуунда кадыкшылының аайы-биле харык-шинээ кошкак уругларлыг өг-бүлелерге четкен.
Аныяктарның хөй-ниити волонтержу организациялары ай санында амыдыралдың берге байдалдарынга таварышкан өг-бүлелерге дузалажып турар. Эрткен дыштаныр хүннерде эки турачыларның «десантызы» бөлүкче «Аныяк гвардейжилерниң» удуртукчузу Самир Аспан-оол, «Юнармиядан» Айдын Шивидек, «Волонтержу рота» организацияның удуртукчузу, блогер Ачыты Нурзат, сайгарлыкчы Денис Даржаа Туран хоорайда хөй-ажы-төлдүг өг-бүлелерге барган.
Волонтержулардан 3 өг-бүле чылыг хептер болгаш аъш-чем наборларын дуза кылдыр алган. Оларның аразында Чаш-оол Монгуш – уруг-дарыын чааскаан азырап чоруур ада. Ооң Дюшен деп оглунуң кадыы кошкак. Эки турачылар бичии оолдуң аарыын эмнедири-биле сенатор Дина Оюнче дилег чагааны кииреринге дузалажыр болган.
Аныяк эки турачыларга туранчылар өске-даа чагыг-дилеглерин киирген.
«Амыдыралдың берге байдалдарынга таварышса-даа, бистиң чаңгыс чер-чурттугларывыс аарыг ажы-төлүн азырап-хайгаарап, оларже кичээнгейни углап чорууру өөрүнчүг» - деп, эки турачылар чугаалап турган.
Алена НАН-ХОО белеткээн.
#коднюинвалидов #тыванын_аныяктары #мгер #молодежь
