«Сүбедей» спортчу школага Россия Федерациязының Камгалал сайыдының кубогу дээш IV Бүгү-россия чергелиг спортчу хүрешке маргылдаалар болуп эрткен. Маргылдаага 9 киржикчилиг 8 шыырак команда бүдүн чурттан киришкен.
Россияның камгалал сайыдының кубогу хостуг болгаш грек-рим хүрештерге, шериглерниң делегей чемпионадынче шилилге маргылдаа кылдыр эрткен.
«Делегейниң ат-алдарлыг мөгелери бистиң республикага кээп хүрежип турары дыка өөрүнчүг-дүр. Аныяк-өскенниң спортчу өзүлдезинге ол улуг идиг» - деп, Тываның Баштыңы В. Ховалыг чугаалаан. Маргылдааны байырлыг байдалга ажыдып тура, тергиин спортчуларны болгаш тренер-башкыларны шаңнап-мактаан.
Күштүглерниң күштүглери 41 дугаар армияның мөгелери турнирге тиилээн. Олар Россия Федерациязының Камгалал сайыдының кубогун чаалап алганын сагындыраал. 2-ги, 3-кү черлерге ЦСКА болгаш Төп-шериг округунуң командалары төлептиг болганнар.
Маргылдааның тиилекчилери ноябрь айда Иранның төвү Тегеранга болур шериглер аразынга делегей чемпионадынга киржир эргени чаалап алганнар.
#кубокминистраобороны #спорт #тыванын_аныяктары
