Тес-Хемге Аныяктар хүнүн байырлаан

Аныяктар хүнүн уткуштур «Молодежь Тувы» фестивальдың иштинде Тес-Хем кожуунга «Аныяктар балы» деп мөөрей болган. Аңаа шупту сумулардан 18-тен 35 хар чедир назылыглар киришкен. Мөөрейни салым-чаяанныг аныяктарны илередип, оларга деткимче көргүзер сорулга-биле эрттирген. Киржикчилер спортчу болгаш латин-америк бал танцызын бараалгаткан. Аныяктар кывыскылыг, солун оюн-тоглааны көргүскен. Көрүкчүлер киржикчи бүрүзүнүң самынга диңмиттиг адыш часкап турган. А жюри кежигүннери номер бүрүзүнүң онзагайын, күүселдезин база костюмнарын үнелеп тургаш, түңнелди үндүрген. «Аныяктар балы» мөөрейниң Гран-При шаңналын Самагалтай суурдан Дильназ Суван болгаш Угер Ликсок чаалап алганнар. Бирги черде Самагалтайдан Байлак Ямбиль база Е. Маадыр, ийиги черде Берт-Даг суурдан Оксана Янгы, Чаян Будегечи, үшкүзүнде Шуурмак суурдан Аймир Тюлюш, Аймира Соян болганнар. Аныяктар уран-талантызын чедимчелиг көргүскеш, Тес-Хемге Аныяктар хүнү кайгамчыктыг өөрүшкү-маңнайлыг, чырык, уттундурбас хемчег-биле эрткенин бадыткаан. Тес-Хемниң медээзинден Мира КОНГУЛ-ООЛ белеткээн. #ДеньМолодежиКультура #ДеньМолодежиТес_Хем #молодёжьтувы