Тарыс аржаанының эм салдары

Тарыс аржаанының эмнээр күжүн чүгле Тываның эвес, а өске-даа регионнарның чурттакчылары эки дыңнаан. Ында 12 эм шынарлыг ванналар бар: «Соок» - температура +14º, +16ºС. Маңаа соокка алыскан, халыын аараан, чүрек-дамыр аарыгларлыг, нерв системазы кошкаанда база хан базыышкыны улгатканда кирер. Эң-не кол чүүл - аржаанның бажы оон эгелээр. «Ала» - температура +34ºС до +23ºС. Мында сугнуң температуразы 2 каът. Аарыг улус бодунуң диагнозун билип алыры дээш кирер. Аржаан мага-боттуң хоочураан аарыгларын күштелдиргеш, мага-ботту улаштыр эмнээринге белеткээр. «Бичии чылыг» - температура +31º, +37ºС. Бо хооргага колдуунда сөөк-даяк аарыглыг бичии уруглар кирер. «Улуг чылыг» - температура +39º,+41ºС. Маңаа остеохондроз, артрит, артроз аарыгларын эмнээр. «Дериттирер» - температура +34º, +35 ºС. Бо аржаан мага-боттуң шупту аарыгларын үндүр тыртып эккээр. Шлак үндүрер, харын-даа дегдириишкинни безин дер-биле үндүр тыртар күштүг. «Ондур» - температура +41º-+46ºС. Оорга, моюн стеохондрозун эмнээр. Эр улустуң хей-аъдын көдүрер. «Муныт» - бо ванна чүгле херээжен улуска тааржыр. Божувас херээжен улуска база уруг савазының аарыгларынга дузалаар. «Дегдириишкин» - температура +32º, +33ºС. Маңаа дегдириишкин, ангина, бронхит, астманы эмнээр. «Чөөн буурек» - температура +48ºС. Оң талакы бүүректи эмнээр. «Барыын буурек» - температура +46ºС. Солагай талакы бүүректи эмнээр. «Шорга» - температура +44º,+45ºС. Остеохондрозту эмнээр. «Беш чүүл» -температура +38º-+40ºС. Шупту аржааннарның күжүн быжыглаар дээш кирер. Алена Нан-Хоо Сөзүглелди болгаш чурукту ажык социал четкилерден алган. #туризм