ТАР-ның 100 чылы-биле төлептиглерни шаңнаан

Бөгүн чазак бажыңынга ТАР-ның 100 чылын таварыштыр күш-ажылчы кижилерге күрүне шаңналдарын база «ТАР-ның 100 чылы» хөрек демдээн, «Буян-Бадыргы» ордени болгаш өске-даа алдарлыг аттарны республиканың сайзырал-хөгжүлдезинге үлүг-хуузун киирип чораан хоочуннарга тывыскан. Шаңнал-макталга төлептиг болган хоочуннарның хөй кезии 80 ажыг харлыг, чамдыктары 90 чоокшулаан. Езулуг-ла ТАР-ның чажыттары. Оларның чашкы үези Тыва Арат Республикага, аныяк назыны Тыва автономнуг областька, күш-ажылчы чылдары Тыва АССР-ге эрткенин база хүндүлүг дыштанылгазын Тыва Республика үезинде амыдырап-чурттап турарын сактып чугаалааннар. Оларның аразында хоочун эмчи, Кызыл хоорайның хүндүлүг чурттакчызы, хөй-хөй шаңнал-макталдарның эдилекчизи Аргина Пала, «Тыванын аныяктары» солунга үр чыл ажылдаан Чооду Кара-Күске, бүгү назынында көдээ ажыл-агый адырынга ажылдаан Өшкү-Саар Ооржак дээш өскелер-даа бар. #100летиеТНР #госнаграды #ветераны #тыванын_аныяктары Буян Ооржактың тырттырган чуруктары.