Тамерлан Тюлюш: Дуза кадып болур арга-шинээмниң чүгле эвээш кезии-дир

Тываның Аныяктар херектериниң талазы-биле яамының сайыды Субудай Оюн эки турачылар-биле кады Таңдыда өөскээн өрттү өжүреринге дузалажыры-биле чедип келген. Аныяктар өртке удур ажылдарга ажыглаар дериг-херекселдерни, идик-хепти эккелген. Ол бүгү чүүлдер Дүрген хемниң эриин дургаар кургаг будуктарны аштап арыглаарынга херек. Таңдыда өрттү өжүреринге аныяктар улуг үлүг-хуузун киирип турарын демдеглээри чугула. Оларның аразында Радмила Күжүгет, Айгуш Сат аъш-чемни, идик-хепти, дериг-херекселдерни саткылаан. Дамырак Сат ногаа-чимис аймаан чоруткан. Аныяк блогерлер база ачы-дуза акциязындан чыда калбаан. Хорам биле Оскар аъш-чем аймаан саткаш, Таңдыга чедиргеннер. Оон аңгыда Тывада Баштайгыларның шимчээшкини, суд приставтарының аныяктар чөвүлели ачы-дузазын көргүскен. Онза өөрүп четтириишкинниң сөстерин тускай шериг операциязының киржикчизи Тамерлан Тюлюшке аныяктар дамчыткан. Тамерлан Тюлюш 100 муң рубльди өрт өжүреринге чоруткан. Тыва дайынчының шилчиткен акша-хөреңгизи-биле хирээлерни болгаш чугула херек херекселдерни садып алырын шиитпирлээн. «Дуза кадып болур арга-шинээмниң чүгле эвээш кезии-дир» - деп, тыва дайынчы Тамерлан Тюлюш чугаалаан. Алена Нан-Хоо белеткээн. Чуруктарны социал четкилерден алган.