Таңды кожуунга Аныяктар хүнүн байырлаан

А.П. Абросимов аттыг стадионга чыглып келген Таңдының аныяктарынга кожууннуң чагыргазының даргазы В.К. Сырат база Тываның Аныяктар херектериниң талазы-биле яамының сайыды С.В. Оюн байыр чедирген. Байыр чедирген удуртукчулардан кожууннуң девискээринге спортчу шөлдү тудар дугайында медээни аныяктар өөрүшкү-биле хүлээп алган. Таңдының идепкейжи аныяктарының ортузунга квест-оюнну база спартакиаданы эрттирген. Спортчу оюннарга Бай-Хаактың аныяктары демниин көргүзүп, бирги черни ээлээш, хой-биле шаңнатканнар. Хол бөмбүүнге Владимировка суурнуң тиилелгеже чүткүлдүг аныяктары тиилекчи болган. Байырлыг хемчегниң база бир кол угланыышкыны – аныяктарны ажылга тургузары. Таңдының Кадрлар төвүнүң оран-савазынга болгаш стадионга бүгү Россияның ажыл ярмарказын организастаан. Аңаа кожуунда база республиканың өске-даа хоорай-суурларында хостуг ажылчын олуттарны сүмелеп турган. Ооң-биле чергелештир тускай шериг операциязының киржикчилеринге болгаш оларның өг-бүлелеринге деткимчениң янзы-бүрү хевирлерин таныштырган. Мира КОНГУЛ-ООЛ белеткээн.