«ТА»-ның хоочуну: күрүне чажыттарын эрттирбес турган

«Тываның аныяктары» солуннуң хоочун ажылдакчызы Сайынмаа Алдын-Хереловна Ондар бо чылын 85 харлаан. Солуннуң аныяк ажылдакчылары хоочунга байырын чедирбишаан, ыраккы 1970 ажыг чылдарда редакцияның ажыл-ижиниң дугайында сонуургап чугаалашкан. - Кызылдың башкы институдун дооскаш, баштай Суг-Аксы школазынга башкылап ажылдап эгелээн мен. Ооң соонда, 1972 чылда, Кызылче көжүп келгеш, «Тываның аныяктары» солунга корректор болуп ажылдап кирдим. Ынчан солунга аныяк журналистер-даа хөй, 2 корректор ажылдап турдувус. Редакторувус Монгуш Байыр-оол Сендажиевич турган. Журналистер – Чооду Кара-Күске, Алексей Бегзин-оол, фотокорреспондент Виталий Шайфулин дээш аныяктар-ла хөй. 1976 чылда цензура салбырынче шилчидим. Ооң долу ады – парлалга адырында күрүне чажыттарын камгалаар эргелел. Солунну чырыкче үндүрер мурнунда шуптузун хынаар, күрүне чажыттарын парлап болбас. Эң-не сөөлүнде солунну парлап болур дугайында атты болгаш таңманы баскаш, дугаар айтып бээривиске, ынчан типографияже дужаар. Материал бүрүзүн кичээнгейлиг номчуур, ынчангаш дүнекиниң 11-12 шакка чедир-даа ажылдаар турган. - Күрүне чажыттарынга чүү хамааржып турган ирги? Кандыг сөстерни чырыкче үндүрүп болбазыл? - Колдуунда шериг кезектериниң дугаарын, турар черлерин, шериг офицерлерниң албан-дужаалын бижип болбас турган. - Россияда Өг-бүле чылы болгай, уруг-дарыыңарны таныштырып көрүңерем. - Оглум, кеним Москва хоорайда чурттап, ажылдап чоруур. Улуг кыс уйнуктарым шагдаа черинде ажылдап чоруур. Үш дугаар кыс уйнуум 11-ги класска өөренир, бичии уйнуум 4 класс четкен. Школачылар ада-иези-биле Москва хоорайда, мен кышты база аңаа эрттирип алыр апардым. «Тываның аныяктары» солуннуң редакциязы Сайынмаа Алдын-Хереловнаның Москвада чурттап чоруур оглу Омак Владимирович Ондар-биле харылзашкан. - Авам «Тываның аныяктары» солунга ат-алдарлыг чогаалчылар, хоочун журналистер дээш солун кижилер-биле кады ажылдап чораан. Оларның аразында Александр Даржай, Чооду-Кара-Күске болгаш өскелер-даа бар. «Тываның аныяктары» солунну үргүлчү номчуур кижи, Москвага келирге, солуннуң Интернет четкизинде арыннарындан медээлерни номчуп бээривиске, аажок сонуургаар. «Тываның аныяктары» солуннуң коллективинге авам Сайынмаа Алдын-Хереловнаны утпайн, чылыг-чымчак сөстерни сөңнеп четкенинге четтиргенимни илереттим. Авамга быжыг кадыкшылды, ам-даа узун назынны, уруг-дарыы, уйнуктарының аразынга өөрүшкү-маңнайлыг чурттаарын күзеп тур мен» - деп, Омак Ондар дамчыткан.