Суд хуралының эң-не тергиин секретарының бирээзи

Кызыл хоорай судунуң дыңнатканы-биле алырга, суд хуралының секретары Уруяна Чечен-ооловна Монгуш «Суд хуралының эң-не тергиин секретары» профессионал арга-мергежилдиң мөөрейинге ийиги черни ээлээн. Мөөрейниң түңнел кезээнге регионнуң девискээринден 14 суд хуралының секретары киришкен. Олар – республиканың район судтарынга эрткен мөөрейлерниң тиилекчилери. Уруяна Чечен-ооловна Монгуш Кызыл хоорай судунда 1 чыл ажыг ажылдап турар. ООң иштинде 11 ай дургузунда суд хуралының секретары болуп ажылдаан. «Уруяна Чечен-ооловна суд адырында ажылдаан стажы хөй эвес-даа болза, хоойлу-дүрүмнерни быжыг билири-биле ылгалып, тергиин билиглиг ажылдакчы деп бодун көргүскен. Аныяк ажылдакчывыска байырны чедирбишаан, ажыл-ижинге чедиишкиннерни күзедивис» - деп, Кызыл хоорай судунуң коллективи демдеглээн. Мира КОНГУЛ-ООЛ. Чурукту социал четкилерден алган.