Студенчи эртем ниитилелиниң чаа даргазын соңгаан

ТывКУ-нуң Студенчи эртем ниитилелиниң хуралы болуп эрткен. Ук хөй-ниити организациязы аныяктарны эртем-шинчилел ажылдарынче хаара тудар, оларның чогаадыкчы салым-чаяанын сайзырадыр, перспективтиг үзел-бодалдарын деткиир сорулгалыг. Очеттуг илеткелди Студенчи эртем ниитилелиниң удуртукчузу, ТывКУ-нуң студентизи Вероника Финогенова кылган. Ол студентилерниң эртем дебаттарын, семинарларын онзалап демдеглээн. Филология факультединиң студентизи Лилия Сендажы эш-өөрүнүң киржип турган эртем хемчеглериниң таныштырылгазын кылган. Оларның аразында “Lingo Quest” квест-оюн, «Социализация. Воспитание. Образование» бүгү делегейниң эртем, методиктиг, чогаадыкчы ажылдарның мөөрейи, «Уран очулга» болгаш "Язык и культура тюркских народов Сибири" аныяк шинчилекчилерниң регионнар аразының мөөрейи бар. Студентилер эртем ажылының чаа-чаа хевирлерин, келир үеде планнарын сайгарып чугаалашкан. Отчет-соңгулдалыг хуралдың түңнелинде, Студенчи эртем ниитилелиниң даргазынга ТывКУ-нуң экономика факультединиң студентизи Аюуш Кур-Седини шилээн. «Студенчи эртем ниитилели дыка хөй өскерилгелерни эртер ужурлуг, ынчалза-даа шупту бир дем-биле ону ажып шыдаар бис! Хөгжүлде программазын сайгарбышаан, мени деткээн эш-өөрүмге четтиргенимни илереттим. Силерниң бүзүрелиңерни бедик үнелеп тур мен» - деп, Студенчи эртем ниитилелиниң чаа даргазы демдеглээн. ТывКУ-нуң медээзинден Алена Нан-Хоо белеткээн.