Социал керээ: хой кыргылдазы

Чаа-Хөл кожуун 250 муң рубльди күрүне дузаламчызы кылдыр алгаш, хой кыргылдазы, ветеринарлыг ачы-дузаны болгаш шээр малдың кажаа-хораазын дезинфекциялаар ажылды организастаан. 2021 чылда социал керээниң киржикчизи Шолбан Бады малчыннарга бодунуң ачы-дузазын чедирип эгелээн. Ол эрткен чылын социал керээ программазынга киришкеш, 250 муң акшага хой кыргылдазынга ажыглаар бирги чергениң дериг-херекселдерин садып алган. «Эрткен чылын мээң төлевилелимни комиссия бадылаан соонда, социал керээ езугаар дериг-херекселдерни садып алган мен. Ол-ла үеде «Боду бодунга канчаар ажылдаарыл: бүрүткелден сайзыраарынга чедир» деп өөредилгени база эрткен мен. Амгы үеде Булуң-Терек суурнуң малчын турлагларында хой кыргып ажылдап эгеледим» - деп, Шолбан Бады демдеглээн. Мира КОНГУЛ-ООЛ белеткээн