Школачылар ярмарказы: уруглар акшаны ажылдап ап турар

«Азия төвү» скульптура комплекизинде Аныяктар хүнүнге тураскааткан янзы-бүрү хемчеглер болган. Ооң иштинде «Бизнес уруглар» деп школачыларның продукциязының делгелге-садыглаашкынының киржикчилери барааннарын делгепкен. Оларның бирээзи – Кызыл хоорайның 9 дугаар школазының 5-ки классчызы Баина Ооржак. «Мен бо чылын 4-кү классты доостум. Ам күзүн 5 класска өөренир мен. 3 класстан эгелээш, бисер-биле аргыырын сонуургап, баштай немелде өөредилге төвүнде бөлгүмче барып турдум. Оон бээр бодумнуң барааннарымны саткаш, акшаны ажылдап ап эгеледим. Кирген орулгамның 50 хуузун херекселдер садып алгаш, артканын бодумга идик-хеп, өөредилге херекселдери, чамдыкта бажыңга аъш-чем-даа садып алыр мен» - деп, ол «Тываның аныяктары» солуннуң редакциязынга таныштырган. Мира КОНГУЛ-ООЛ