Шииттиргеннерге маадырларның портреттерин таныштырган

Кызыл хоорайның 1 дугаар эдип-чазаар колониязында шииттирген кижилерге Радомир Балганның уран чүүл экспозициязын таныштырган. Чурукчу Ада-чурттуң Улуг дайынының, интернационалчы дайынчыларның база тускай шериг операциязының киржикчилериниң портреттерин бараалгаткан. Делгелгениң сорулгазы - төрээн чуртунуң төөгүзүн билип алырынга, Россия дээш чоргааралды оттуруп, харын-даа харыысалгалыг болурунче угланган. «Россияның төөгүзүн алгаш көөрге, ол бодунуң эрге-ажыы дээш тулчур ужурга таваржып турган. Шак ындыг үелерде чуртувустуң езулуг маадырлары көстүр - тиилелгеже чүткүлдүг, сеткил-соруу чылча шаптынмаан бөдүүн кижилер-дир. Россияның маадырлары дээрге-ле төрээн чуртунга, черинге, өг-бүлезинге бердинген хамаатылар-дыр. Россия - маадырларның чурту!" - деп, Радомир Балган демдеглээн. Делгелгениң төнчүзүнде киржикчилерге портрет чуруур мастер-классты эрттирген. УФСИН-ниң чуруктары болгаш медээзинден.