Шагааның Ак айы: Каа-Хем кожууннуң күш-ажылдың хоочуннарынга байыр чедирген
Республикада чарлаттынган Тургузукчу күш-ажылдың болгаш өг-бүле ыдыктарының чылында Каа-Хем кожуун чагыргазының удуртулгазы күш-ажылдың хоочуннарынга аалдап чедип, Тываның Баштыңының Шагаа-биле байыр чедирген ажык чагаазын дамчытканын чагырга чери дыңнаткан.
Кожуун чагыргазының төлээлери Дамбаларның кыштаанга чедип, ак кадакты сунуп, чаларап келген Аът чылы-биле байыр чедирип, суй белектерни тывыскан.
Көдээ ишчилер өг-бүле тудуп, кады эгин кожа чурттанындан бээр 50 чыл оюн демдеглеп эрттирген. Өгнүң ажылгыр болгаш идепкейжи херээжен ээзи Светлана Акимовна ногаа ажыл-агыйын сайзырадыр талазы-биле планнары-биле үлешкен.
Энениң назыны чеже-даа улгады берген болза, ол перец өзүмнерин тарып олурткан. Ол чылдың-на ногаа өзүмнерин эртежик тарып олуртур чаңчылдыг. Малчын өг-бүле хөй чылдарның дургузунда ногаа аймаа, картофельден аңгыда каттар база өстүрүп турар. Светлана Акимовна аалчыларын амданныг вареньези база дузаан мөөгүлери-биле хүндүлээн.
Дамбаларның аалында бода малдың деңгели эки, сирген-ширбиил курлавыры четчир. Эрес-кежээ малчыннар ажы-төлү база уйнуктары-биле чоргааланып турар.
Дараазында Кундустуг сумузунуң ажыл-ишчи чурттакчыларының бирээзи, хүндүлүг Май-оол башкыга четкен. Ол өөнүң ишти-биле сумунуң хөй-ниити хемчеглериниң идепкейлиг киржикчилери.
Тываның Баштыңы Дээди Хуралга Айтыкалында 2026 чылды – Тургузукчу күш-ажылдың болгаш өг-бүле ыдыктарының чылы кылдыр чарлаанын сагындыраал. «Ажылчын кижиге хүндүткел болгаш өг-бүлениң одаанга бердинген чорук бистиң республикавыстың хөгжүлдезиниң кол шимчедикчи күжү чораан болгаш болуп артар» – деп, Владислав Ховалыг демдеглээн.
