Сүт-Хөлдүң эмчи даңгыналары

«Сүт-Хөл кожууннуң эмчи даңгыназы» мөөрейни эмчилер хүнүн таварыштыр эрттирген. Аңаа 9 эмчи киришкен. Ак халаттыг чараш кыстарның аразындан «Сүт-Хөлдүң эмчи даңгыназы» атка поликлиниканың эмчи сестразы Мария Ооржак төлептиг болган. Ол «Аметист» ювелирлиг садыгдан 10 муң рубльдиң сертификадын алган. «Вице-мисс» деп атты база-ла эмчи сестразы Алдынай Ооржак чаалап алган. «Мисс Грация» - дүрген дуза станциязының фельдшери Аржаана Ондар, «Мисс Талант» - терапевт эмчи Шончалай Ондар. «Национал костюм» номинацияга терапия салбырының эмчи сестразы Чойган Сарыглар тиилээн, а көрүкчүлерниң үнелелин Айда-Сай Ондар чаалап алган. Божуур бажыңның эмчи сестразы Айлаң Ондар «Мисс эрудиция» номинацияга тиилээн. Кызыл-Тайга суурнуң ФАП эргелекчизи Херелмаа Сат «Каас-коя мисс» атка төлептиг болган. А уруглар эмнелгезиниң эмчи сестразы «Биче сеткилдиг мисс» деп атты алган. Шупту киржикчилерге кожууннуң төп эмнелгезиниң кол эмчизи Лидия Ондар байыр чедиргеш, шаңнал-макталдарны тывыскан. Сүт-Хөлдүң медээзинден Мира КОНГУЛ-ООЛ белеткээн.