Сайлыкмаа Комбу: "Шүлүк дээрге арыг сеткил-дир"

Бүгү делегейниң шүлүк чогаалын бижип чоруур ховар салым-чаяанныг кижилерниң байырлалы болуп турар. Бо удаада республиканың өөредилге черлеринде студентилер-биле ужуражылгаларны "Тываның чогаалчылар эвилелиниң" кежигүннери организастаан. Сайлыкмаа Комбу, Тываның чогаалчылар эвилелиниң даргазы: "Март 21 - бүгү делегейниң шүлүк чогаалчының хүнү. Бүгү делегейниң шүлүкчүлери-биле кады хензиг биче Тывавыстың каш санныг шүлүкчүлери база байырлап турар. Бөгүн шүлүкчүлер бүрүзү боттарының шүлүктерин номчуп, чер-черлерде ужуражылгаларны эрттирип турар. Шүлүк дээрге төөгү-дүр. Шүлүктен бүгү төөгүнү билип ап болур бис. Шүлүк дээрге арыг сеткил, кижиниң миниишкининиң эң-не дээдизи, арыг сеткили шүлүкте сиңген, ында илереттинген. Шүлүк дээрге бо хүнде, келир үеде база эрткен үеде чуртталгавыс-тыр" - деп, уран-чечен сөстерни ол аныяк номчукчуларга дамчыткан. Мира КОНГУЛ-ООЛ.