РФ-тиң национал гвардиязының Пермьниң шериг институдунуң курсантызы-биле ужуражылга
Чадаана хоорайның 3 дугаар ортумак школазының 11-ги классчылары РФ-тиң национал гвардиязының Пермьниң шериг институдунуң курсантызы Чингис Ооржак-биле ужурашкан.
Өөреникчилер Төрээн чуртунуң камгалакчызы мергежилдиң дугайында хөйнү билип алганнар. Курсант Чингис Омакович Ооржак өөредилге чериниң, келир үениң офицерлеринге шериг мергежилдериниң, чаңчылдарының болгаш курсантыларның хүн бүрүде амыдыралын таныштырган.
Школачылар улуг сонуургал-биле дыңнап, сонуургаан айтырыгларын салганнар. Курсантының шериг дурт-сыны, патриотизм, шыңгыы чоруу, бедик билиглии база чугааккыры школачыларның хүндүткелин оттурган.
Ол ышкаш Кызыл шөлге байырлыг чыскаалга белеткел дугайында таныштырган. Курсант-биле ужуражылга чүгле оолдарга эвес, а уругларга база солун болган. Уруглар шериг мергежилди шилип алырынга беленин дамчыткан.
#Профориентация17 #патриотизм
