Патриотчу ай: Аныяк оолдарның эр мөзү-бүдүжүн хевирлээр

Тываның Дээди Хуралының депутады Буян Донгак база ТР-ниң Улустуң артизи Андрей Монгуш Тываның көдээ ажыл-агый техникумунуң студентилери-биле ужуражылганы эрттирген. Ужуражылганың кол темазы – эр мөзү-бүдүш, төрээн чуртунга ынакшыл база эрес-дидим чорук. Буян Донгак база Андрей Монгуш аныяк оолдарга боттарының амыдыралчы оруундан арга-дуржулгазын таныштырып, езулуг-ла лидер болгаш чуртунуң төлептиг хамаатылары болурунга чүү херегил деп айтырыгны сайгарып чугаалашканнар. «Оларның үзел-бодалын аныяктар аажок сонуургаан болгаш, оолдарның хей-аъдын көдүрген. Аалчыларывыска четтиргенивисти илереттивис. Бо ужуражылга студентилерниң хамааты туружун болгаш төлептиг кижи болуп хевирлеттинеринге ужур-дузалыг болганынга бүзүрээр бис» - деп, техникумнуң башкылары демдеглээн.