Пассажирлер аргыштырылгазын көвүдеткен
2025 чылда Тывада пассажирлер аргыштырылгазының доктаамал автобустары 2024 чылга деңнээрге 7,1 хуу хөй, азы 14,5 сая пассажирни сөөрткен. Азы пассажирлер аргыжылгазы 9,0 хуу көвүдеп, 310,6 сая пассажир-километр болган. Тыва Республиканың Орук-транспорт яамызының февраль 19-та болган хуралынга 2025 чылда хөй-ниитиниң автомобиль транспортунуң ажылының түңнелдерин үндүрген.
Яамы Кызыл мэриязы-биле кады хоорай маршруттарын хандырарынга «Чедингир хүрээлел» система-биле дериттинген 12 КамАЗ ВЕГА автобустарны садып алганы пассажирлер аргыштырылгазын көвүдедип, ол ышкаш 2025 чылдың марттан октябрьга чедир «Кызыл – Абакан – Кызыл» регионнар аразында маршруттуң рейстер санын неделяда чеди чедир улгаттырган.
Хоорайның автопарыгын чаартканы регионга 2025 чылда «Хөй-ниити транспортун хөгжүдер» федералдыг төлевилелдиң сорулгазын чедип ап, азы республиканың хөй-ниити транспортунуң парыгының негелде ёзугаар 60 хуузун чаарткан.
Республика девискээринде муниципалдар аразында пассажирлер аргыштырар 16 маршрут доктаамал ажылдап турар, оларның 11-и Кызыл агломерациязында болза, Барыын-Хемчик кожуунда ийи база муниципалдыг тургузуглар аразында үш маршрут ажылдап турар. «Кызыл – Абакан – Кызыл» деп регионнар аразында чаңгыс маршрут база бар.
«Туваавтотранс» КХН, «Автоколонна 17» КХН, «Авто-17» КХН бүдүрүлгелер, ол ышкаш Тыва Республиканың Орук-транспорт яамызы база Кызылдың мэриязы-биле керээ чарган хууда сайгарлыкчылар пассажирлер аргыштырылгазын хандырып турар. Хуу сайгарлыкчылар пассажирлер сөөртүлгезиниң хөй кезиин хандырган.
Амгы үеде ниитизи-биле 159 автобус пассажир аргыштырылгазынче хаара туттунган, оларның 70 хуузу «Угаанныг транспорт» системазында коштунган. Арткан автобустар системаже ам коштунар, ол ажылдар ноябрьга чедир доостур ужурлуг.
А. МОНГУШ.
Чурукту ТР-ниң Чазааның медээзинден алган.
