Одалга үезинге белеткелди Тываның Баштыңы хүн бүрү хайгаарап турар

Тывада чылыг-энергетика комплекизин болгаш чуртталга-коммунал ажыл-агыйын келир кышка белеткээриниң талазы-биле ажыл-иш кидин түлүк. Инвестицияларның ниити түңү 456 сая рубль болган, ооң 150 сая ажыы республика бюджединден кирген. Арткан акша-төгерикти муниципалитеттер, курлавыр хандырар организациялар, эргелеп-башкарыкчы компаниялар болгаш бажың-балгат ээлериниң эштежилгелери киирген дээрзин Тываның Баштыңы Владислав Ховалыг бодунуң блогунга бижээн. Ооң чугаазы-биле алырга, белеткелдерниң иштинге гидравликтиг шенелделер үезинде илереттинген четпестерни чок болдурары-биле, чеди хире километр коммуникацияларны септээр. Чылыг таарыштырар объектилерде котельнаяларның база дузалал дериглериниң үндезин болгаш агар септелгезин чорудар. Ол ышкаш ырак-узак суурларже соңгу сөөртүлге-чедирилгени эгелей берген. Одалга үезинге Шагаан-Арыг хоорайның белеткелинче онза кичээнгейни углап турар, маңаа чаа ЧЭТ-ти салыры көрдүнген. Бо чылдың мартта болган озал-ондактың уржуктарын чайлаткан, ийи котелдуң үндезин септелгези чоруп турар. Ол ышкаш Шагаан-Арыг хоорайга курлавырда турар сес көжүп чоруур котельнаяны ажыглаары көрдүнген. «Улуг объектилерниң белеткелинден аңгыда, эргелеп-башкарыкчы компаниялар болгаш бажың-балгат ээлериниң эштежилгелери септелге ажылдарын саадаткан ажыы чок. Хөй аал чурттаар бажыңнарның инженер дериглери көрдүнген хуусаазында шынарлыг септеттинген болур ужурлуг. Республиканың Чуртталга-коммунал ажыл-агыйының яамызы Одалга яамызы-биле кады ол бүгү ажылдарны хыналдага алыр ужурлуглар” — деп, Тываның Баштыңы демдеглээн.#шын