Ном - чырыктың болгаш буянныг чоруктуң үндезини

Ном саңы – кайгамчыктыг чер. Номга ынактар ооң-биле бичиизинден тура таныш. Кандыг-даа ном саңындан олар бир-ле чаа чүүлдү тып, ажыктыг медээлерни оон ап, өөрүшкүнүң дөзү, амыдыралда чугула дузалакчы апарганын билирлер. Амгы үеде, чурагайлыг информация технологиялары сайзыраза-даа, ном саңнары культурлуг төптер болуп артпышаан. «Культура» национал төлевилел езугаар Өвүр кожууннуң төп библиотеказы эрткен чылын чаарттынып, «Монгуш Доржу аттыг районнуң төп модельдиг библиотеказы» деп атты алган. Өвүрнүң район судунуң ажылдакчызы Алдынай Хирбээниң дыңнатканы-биле алырга, ук кожууннуң шүүгү органының ажылдакчылары Демир Түлүштүң «Древние города Тувы» деп номун чаарттынган библиотекага белекке сөңнээн. Номнуң кол утказын англи дылче очулдургаш, катап чырыкче үндүрген. Ында Тываның девискээринге буруңгу хоорайларының хөй чылдар иштинде археологтуг шинчилелдеринден барымдааларны автор киирген. Мира Конгул-оол Чуруктарны социал четкилерден алган